NAPAK MASIGIT: Juli 2012

Rachmat Affandhi

Masigit Garoet...
Masigit,nya eta tajug gede di tengah-tengah kota, biasana ngadeg beh kuloneun alun-alun kitu kasauran R.A Danadibrata, ..kitu deui ngawitan ngadeg masigit garut dina waktos kolonial walanda biasana disebat De Mohammedaansche Moskee .. masigit pikeun umat nabi muhammad saw ... masigit garut tiasa janten ngadeugkeunnana sasarengan dina ngamimitian waktos ngabaladah pi garwaeun hiji dayeuh kabupaten limbangan, anu ciri-cirina aya wangunan pendopo pikeun tempat dines bupati sareng panglinggihan keluargina, wangunan asisten residen tempat ngontrol jalanan pamarentahan kabupatian, sareng wangunan bale watangan pikeun jalmi nu ngalanggar kana aturan pamarentahan jeung adat istiadat ... alun-alun tempat ngumpulkeun para rahayat pikeun ngembarkeun bewara penting ti kangjeng dalem, sareng masigit atawa kaum tempat dinesna para naib atawa penghulu pikeun nyatet anu nikahkeun sareng anu ngantunkeun maot ... tempat seba sedekah arwat, sedekah maulud, baitul mal pikeun ngempelkeun zakat fitrah ... tempat ngamajengkeun jeung nga mumule umat islam..tina bagbagan agami...

Waktos kabupaten limbangan ngalih ka wewengkon ki garut kinten-kinten tahun 1813.. nu ngawitan ngagagas alihan nyaeta ku alpukahna kang jeng dalem Raden Adipati Aria Adiwidjaja (1813-1831)..nu biasa disebat dalem cipeujeuh..
Jaman harita saatosna dayeuh garut ngadeug teu patos lami garut ngawitan nanjeur sareng kawentar ka tatar priangan, kantenan waktos harita aya dua tokoh nu sosobatan dalit ..ceuk paribasa ka cai jadi saleuwi ka darat jadi salebak . meh unggal waktos eta dua tokoh teh sasarengan, ceu basa kawi mah disebat “dwi tunggal”, nyaeta Raden Haji Moehamad Moesa (1822-1886) Penghulu Besar (Hoofdpenghoeloe) sosobatan sareng tuan Karel Frederik Holle(1829-1896) juragan perkebunan cikajang bangsa walanda nu paduli kana kamajuan kabudayaan sunda jeung agama islam di wewengkon garut.. Aranjeuna nu seueur ngarojong tur ngiring ngamajengkeun marotekar na rahayat garut pikeun gawe bareng rancage ngaronjatkeun garut janten majeng.. janten dayeuh nu mandiri...malihan kanggo pangemut kana jasa na diwangun patung tuan Holla satengah dada di beh kalereun alun-alun caket wangunan Asisten residen mayuneun jalan societestraat, Jalan A yani ayeuna .. sareng nami K.F. Holle janten nami jalan Hollestraat, Jalan Mandalagiri ayeuna...sareng jalan panjiwulung keur pangemut hasil karya Raden H. Moesa dina widang sastra jeung anggitan ..

Dayeuh Garut kalintang asrina tur endah matak betah nu bumen bumen ..matak haget sumanget pikeun nu barangsiar.. ayem temtrem .. rakyatna seneng kana budaya seni karuhun .. kana agamina kiat jeung rukun sabilulungan ..runtut raut sauyunan.. kasemah nu anyar datang someah teu weleh mika hormat .. garut janten katelah kawentar ka mancanagara janten dayeuh pangirutan.. kampung endah camperenik ..garoet mooi.. swiss van java atawa paradijs van garoet... kitu katelah jaman walanda harita...

Kitu deui waktos jamanna kangjeng bupati raden adipati aria wiranata nu datar (aom Jenon)...(1871-1915)..nu biasa disebat dalem bintang ..tah didieu ngawitan masigit bale nyungcung diwangun weweg ...suhunan na tumpang tilu nyungcung ka langit sapertos gugunungan, wangunan tajug digentos ku bahan batu bata jeung hateupna ngangge kenteng buatan kampung lio (pabrik kenteng jeung bata)... sakuriling dipager tembok barolong saperti model sisit lauk..dipayuneun masigit aya jalan namina jalan moskeestraat.. Kitu deui pengkereun masigit garut aya makam para bupati sinareng keluargina nu tos ngantunkeun biasana disebat dalem kaum...beh kiduleun masigit aya balong alit tempat abdas nu bade netepan ...ti pengkeren masigit eces netra beh kuloneun alun alun ngajajar gunung-gunung diantawisna gunung papandayan nu teu liren ngepul aseupna tug dugi ka kiwari..dipayunan masigit aya tangkal caringin ti sisi ti gigir matak nambih wibawa...

Ciri-cirina masigit tradisional jaman baheula..saur menir DR. H.J. de graff, tina bukuna “de oorsprong der javaanse moskee,” tahun 1947, nyaeta : lahan pakarangan persegi , mihrab, pawestren, bedug, jeung kohkol, kolam tempat wudu, wangunan ngahadep pas ka wetan, aya makam karuhun, benteng tapi teu aya menara... dipager tembok barolong saperti model sisit lauk..model ieu dirancang ku arisitek kamashur menir Maclaine Pont (nu ngarancang wangunan utama technische hooge school, itb ayeuna, 1920...)

Dina tahun 1970an masigit khas kabudayaan sunda bale nyuncung nu tos ratusan tahun teu aya jungkiringna ..dirombak sadayana janten masjid agung ngangge kubah ala timur tengah.. kantos direnovasi kumargi harita aya kajantenan kubah mesjid runtuh sorana handaruang kadangu ka mana mana ..duka kila kila naon harita kubah nu sakitu wewegna tiasa runtuh...tah tisaprak harita kinten-kinten tahun 1981 dirobih suhunanna janten sapertos kopeah (kopeah muslim asli pasundan) nu didamel tina seng gelombang .. tapi teu kungsi lami model kopeah...

Dina tahun 1994 mesjid agung dirobah deui janten model timur tengah langkung moderen tur megah, aya kubah ageung jeung opat manara, sapertos nu katinggal kiwari .. sareng arah kiblat sakantenan diarahkeun ngangge alat GPS (Global Positioning System) nu dipidamel ku para ahli geodesi ti ITB asli urang garut...Ayeuna mesjid Agung Garut gaduh lahan nu luasna hampir 320 bata ...mung jalan moskeestraat janten teu aya langsung halaman na ka alun-alun.. dina sasih syaum 1433 Hijriah..atanapi sasih Juli 2012.

https://www.facebook.com/photo.php?fbid=506029972745621&set=o.137650916361417&type=1&theater